عزيزي الزائر / عزيزتي الزائرة يرجي التكرم بتسجبل الدخول اذا كنت عضو معنا
او التسجيل ان لم تكن عضو وترغب في الانضمام الي اسرة المنتدي
سنتشرف بتسجيلك
ويرجى العلم بأنه يمكنك الاطلاع على المواضيع دون التسجيل

شكرا
ادارة المنتدي

أحمد حلمي يكتب: جواب

استعرض الموضوع السابق استعرض الموضوع التالي اذهب الى الأسفل

default أحمد حلمي يكتب: جواب

مُساهمة من طرف pro.eng في السبت فبراير 20, 2010 9:20 pm



صادف وجودي في إسبانيا احتفالات الفلانتين.. اكتشفت أن إحنا في مصر بنحتفل بعيد الحب ده أكتر من الأوروبيين بكتير.. اللي ماشفت وردة حمرة في إيد واحد أو واحدة.. واضح إن الحب عند الناس دي في القلب

أمي الحبيبة.. تحية طيبة وبعد.. أرسل لك خطابي هذا من خارج حدودك الدافئة.. أرسل لك خطابي هذا من إسبانيا.. من برشلونة تحديدا.. ودي أول مرة في حياتي آجي هنا.. وأحب أطمنك إني كويس، وصحتي كويسة، وكل حاجة حلوة حواليا.. ماعدا الظروف اللي باكتب لك فيها الجواب ده.. الجو هنا برد جدا جدا.. وأنا قاعد دلوقتي علي إحدي القهاوي الإسبانية البرشلونية.. قصدي الكافيهات الإسبانية.. أصلهم هنا ماعندهمش قهاوي، وتقريبا أنا المجنون الوحيد اللي قاعد برة الكافيه مش جوه.. ومكلفت نفسي ولابس تلتميت حاجة.. أهمهم طبعا الكلسون الصوف المصري الصعيدي الأصيل، اللي بيحمي من برد بلاد بره.. ده غير الفانلة الحملات وغير الحملات، والبلوفر والجاكت والكوفية والشراب الصوف التقيل اللي مخلي الجزمة ضيقة علي رجلي.. بس أعمل إيه.. لو ماعملتش كده، هانشف من البرد، وطبعا لا غني عن الجوانتي اللي اضطريت للأسف أقلعه علشان أعرف أكتب علي اللاب توب.. وكل ما أكتب كلمتين تلاتة ألبسه شوية علشان أرجع أدفي إيدي قبل ما صوابعي تقع من البرد، وأرجع أقلعه تاني عشان أكمل كتابة.. لحد ما هايجيلي انفصام في الشخصية.. ده غير صراعي مع بطارية اللاب توب اللي فاضلها نص ساعة وتخلص.. أصلي نسيت أشحنها قبل ما أنزل من الفندق.. عشان كده مضطر أفكر بسرعة في اللي هاكتبه.. لأن المفروض أبعت الجواب ده بالكتير دلوقتي حالا عن طريق الإنترنت من خلال الإيميل.. ولو سألتيني: ليه ما احترمتش نفسي وحميتها من البرد الرهيب ده، وقعدت أكتب في الفندق، هاتكون إجابتي: مش عارف.. أنا قلت أجرب وأنزل اكتب في الشارع.. صحيح جنبي دفاية.. بس الحقيقة بتدفي نفسها.. مش عاملة أي حاجة خالص.. جايز اللي مصبرني علي البرد إني باكتب الجواب ده.. الناس قدامي رايحة جاية.. اللي شايل شنطة، واللي ماسك في إيده عيل، واللي ساحب وراه كلب، وكلهم متكلفتين زيي.. فنجان القهوة بيبرد قبل ما الجرسون يحطه قدامي.

أمي الحبيبة.. أحب أقولك إني شفت حاجات كتير هنا شبه اللي عندنا.. شفت بيوت وعمارات علي الطراز الإسلامي والعربي.. أكلت أكلة عبارة عن طبق كده فيه شوية رز علي جمبري علي سمك علي شوية حاجات مش مفهومه، وكلها معجونة في قلب بعض وجوه بعض.. شكلها يقرف.. بس طعمها حلو قوي.. الأكلة دي اسمها «باييا»، ولما سألت عن سر الاسم، قالولي إنه اسم عربي بمعني «البقية»، والسبب في تسمية الأكلة بالاسم ده، أنه مقصود بيها بواقي الأكل، وبعد ما اطمنت إنه مش بواقي أكل حد تاني من اللي قاعدين جنبي في المطعم، كملت أكل.. ثانية واحدة، هاطلب قهوة تاني بدل اللي بردت.. «مرت خمس دقايق».. معلش اتأخرت، أصل التفاهم كان صعب شوية مع الجرسون.. باحاول أفهمه أنا عايز إيه، وهو مش فاهم، فكان الحل إني أشاورله علي الفنجان اللي برد، وأقوله: واحد تاني.. بلغة الخرس، والحمد لله فهم، وراح يجيب قهوة تانية.. واضح أنه أخرس.. عايز أقولك إنه بالرغم من إن الجو برد جدا، لكن الهوا نضيف ونقي لدرجة إني جالي حساسية من الأكسجين النضيف.. كمان في حاجة مضايقاني شوية لقيتها في الفندق، وأنا باقلب في قنوات التليفزيون إمبارح قبل ما أنام.. مالقيتش ولا قناة عربية.. مش عارف ليه! مع إن قناة الجزيرة القطرية موجودة.. شكيت إن قطر مش دولة عربية، بس اتأكدت لما لقيت المذيع بيتكلم عربي زينا.. مش عارف ليه قنواتنا العربية مش موجودة في إسبانيا.. شفت كمان حاجة غريبة جدا.. عارفة شفت إيه! شفت عجل كتير مركون علي الرصيف.. كله شكل واحد، ومقفول بقفل كده من عند الجادون.. وطبعا سألت: إيه العجل ده وبتاع مين؟ قالولي إن العجل ده بتاع الحكومة.. عاملاه للمواطنين باشتراك سنوي أربعين يورو في السنة.. يعني حوالي تلاته يورو ونص في الشهر.. وفايدة العجل ده إن أي واحد مشترك فيه، يحط الكارت بتاعه والقفل يتفتح، وياخد العجلة يروح بيها مشواره، وبعدين يركنها في أقرب موقف للعجل جنبه.. وطبعا العجل ده في كل شارع من شوارع برشلونة، والمشروع ده الحكومة عملته عشان تقلل من كمية التلوث اللي مش موجود أصلا! الغريب بقي يا أمي إن محدش بيسرق العجل.. ماحدش فكر ياخد عجلة ويأجرها أو يفككها ويبيعها في وكالة البلح بتاعة إسبانيا.. لفت نظري كمان إن الناس كلها بتمشي بسرعة.. حتي اللي بيتمشوا بيمشوا بسرعة.. الناس هنا بتقدر الوقت، وكأنه أهم من الأكل والشرب.. ثانية واحدة عشان القهوجي.. قصدي الجرسون جايب القهوة وجاي.. «مرت خمس دقايق».. معلش اتأخرت.. أصل الجرسون جاب القهوة باللبن، وأنا طلبتها من غير لبن.. وطبعا هاشربها باللبن لأن مستحيل يفهم.. ده فهم إني عايز قهوة بالعافية.. المهم.. صادف وجودي هنا احتفالات الفلانتين.. عيد الحب.. اكتشفت إن إحنا في مصر بنحتفل بعيد الحب ده أكتر من الأوروبيين بكتير.. اللي ماشفت وردة واحدة حمرة في إيد واحد أو واحدة.. واضح إن الحب عند الناس دي في القلب مش في الورد الأحمر والهدوم الحمرة بس. أمي الحبيبة.. باركيلي أنا ماشي علي الرصيف.. أنا مش شايف زبالة.. أنا باعدي الشارع من علي خطوط المشاة.. أنا بردان.. بس مش مهم.. أمي الحبيبة أنا مش فاهم الناس، ولا الناس فاهمني بس مبسوط.. أمي الحبيبة كان نفسي تكوني معايا عشان تشوفي وتتفرجي بنفسك.. لو كان ينفع أجيب الحاجات الحلوة اللي هنا معايا عندك، كنت جبتها.. بس مش هاينفع، عشان دي حاجاتهم مش حاجاتنا.. بتاعتهم مش بتاعتنا.. بس لما أرجع، ممكن أحكيلك عن كل اللي شفته، وأفرجك كل الصور اللي صورتها.. هافرجك صور الشوارع والبيوت النضيفة.. هاصورلك صورة للسما والسحاب عشان تشوفي الجو هنا عامل إزاي.. هاصورلك ضحكة الجرسون اللي طلعت عينه، ومش متضايق مني.. هاصورلك ناس جايز يكونوا مش مؤمنين خالص.. بس مؤمنين جدا.. هاصورلك نفسي.. ومتستغربيش لو لقيتي شكلي مختلف عنهم.. لأني هابقي متضايق ومتحسر ومغلول.. لأني هابقي أناني وباقول إشمعني هما.. أمي الحبيبة.. وحشتيني بالرغم من إني مابقليش أسبوع هنا.. أمي الحبيبة.. بحبك أكتر من أمريكا وإسبانيا وفرنسا وانجلترا والصين واليابان وكل بلاد الدنيا.. أمي الحبيبة.. نفسي أسألك سؤال حتي لو معندكيش جواب.. بس هاسأله.. هو ليه الحلو مبيكملش يا أمي.. هو ليه إحنا عندنا بنلاقي العضم في الكرشة.. الناس هنا عاديين زينا.. عندهم إيدين ورجلين وعنين ومناخير ومخ، وبياكلوا وبيشربوا زينا، وبالرغم من كده.. حاسس إنهم مختلفين عننا.. أمي الحبيبة.. البطارية خلاص خلصت.
المصدر:
من هنا

pro.eng
.
.

ذكر عدد الرسائل : 742
القسم : حاسبات
شخصيتك : الدماغ العاليه
الفرقه : الرابعه
المزاج :

http://ashraf7amdy.blogspot.com/

الرجوع الى أعلى الصفحة اذهب الى الأسفل

default رد: أحمد حلمي يكتب: جواب

مُساهمة من طرف Zekus في السبت فبراير 20, 2010 9:45 pm

كتابات احمد حلمي عموما حلوه

الف شكر يا ريس


Zekus
.
.

ذكر عدد الرسائل : 1943
القسم : *مش من الكليه*
الفرقه : الرابعه
المزاج :

الرجوع الى أعلى الصفحة اذهب الى الأسفل

default رد: أحمد حلمي يكتب: جواب

مُساهمة من طرف eng.roma في السبت فبراير 20, 2010 10:31 pm

حلو اوى الموضوع ده
جزاك الله خيرا ياباشمهندس

eng.roma
.
.

انثى عدد الرسائل : 344
القسم : حاسبات
شخصيتك : طيب
المزاج :

الرجوع الى أعلى الصفحة اذهب الى الأسفل

default رد: أحمد حلمي يكتب: جواب

مُساهمة من طرف ghad في السبت فبراير 20, 2010 10:57 pm

غلطان أحمد حلمى ف اخر الجواب
ايه ناس عاديين زينا دى.. دول بياكلوا خنازير.. وهيدخلوا النار ف الاخر مهما نضفوا ف بلادهم
احنا مفيش حد زينا

ghad
.
.

انثى عدد الرسائل : 1258
القسم : حاسبات
شخصيتك : هادي

http://forum.wordreference.com/

الرجوع الى أعلى الصفحة اذهب الى الأسفل

default رد: أحمد حلمي يكتب: جواب

مُساهمة من طرف zizoelazizo في الأحد فبراير 21, 2010 4:48 pm

تسلم يا اشرف انت واحمد حلمي موضوع جامد

zizoelazizo
.
.

ذكر عدد الرسائل : 225
الهوايات : Drawing
القسم : حاسبات
شخصيتك : هادي
الفرقه : الثالثه
المزاج :

الرجوع الى أعلى الصفحة اذهب الى الأسفل

default رد: أحمد حلمي يكتب: جواب

مُساهمة من طرف hazem في الإثنين فبراير 22, 2010 12:53 am

جميييييييييييييييييييييييل جدا


وفعلا محدش زينا لاننا شعب بيشتم اخوه بسبب ماتش كوره

ومئات الالاف بيستقبلوا منتخبهم ولبرادعى بيستقبلوا عشرات و.....

hazem
.
.

ذكر عدد الرسائل : 967
الهوايات : photography ,mobiles
القسم : حاسبات
شخصيتك : هادي
الفرقه : الرابعه
المزاج :

http://www.facebook.com/hazem.saiegh

الرجوع الى أعلى الصفحة اذهب الى الأسفل

default رد: أحمد حلمي يكتب: جواب

مُساهمة من طرف باربى في الإثنين فبراير 22, 2010 5:57 pm

hazem كتب:جميييييييييييييييييييييييل جدا


وفعلا محدش زينا لاننا شعب بيشتم اخوه بسبب ماتش كوره

ومئات الالاف بيستقبلوا منتخبهم ولبرادعى بيستقبلوا عشرات و.....
فعلا 

باربى
.
.

انثى عدد الرسائل : 891
القسم : حاسبات
شخصيتك : رومانسي أوي
المزاج :

الرجوع الى أعلى الصفحة اذهب الى الأسفل

default رد: أحمد حلمي يكتب: جواب

مُساهمة من طرف muslima في الثلاثاء فبراير 23, 2010 12:19 pm

جميله اوي ...

muslima
.
.

انثى عدد الرسائل : 207
الهوايات : reading-Design
القسم : حاسبات
الفرقه : الرابعه
المزاج :

الرجوع الى أعلى الصفحة اذهب الى الأسفل

default رد: أحمد حلمي يكتب: جواب

مُساهمة من طرف Gawish في الثلاثاء فبراير 23, 2010 4:11 pm

ghad كتب:غلطان أحمد حلمى ف اخر الجواب
ايه ناس عاديين زينا دى.. دول بياكلوا خنازير.. وهيدخلوا النار ف الاخر مهما نضفوا ف بلادهم
احنا مفيش حد زينا
التعليق دا جامد
بس لذيذ الجواب برده

Gawish
.
.

ذكر عدد الرسائل : 3463
الهوايات : اكيد مش المذاكرة
القسم : حاسبات
شخصيتك : رخم
الفرقه : الثالثه

http://www.mcse.lifeme.net

الرجوع الى أعلى الصفحة اذهب الى الأسفل

default رد: أحمد حلمي يكتب: جواب

مُساهمة من طرف روح في الثلاثاء فبراير 23, 2010 8:37 pm

hazem كتب:جميييييييييييييييييييييييل جدا


وفعلا محدش زينا لاننا شعب بيشتم اخوه بسبب ماتش كوره

ومئات الالاف بيستقبلوا منتخبهم ولبرادعى بيستقبلوا عشرات و.....

اه فعلا بس الشعب دا انا وحضرتك واخويا وابن عمى وابن خالى وقريبتى اللى فى القاهره واللى فى الاسكندريه
يعنى احنا ومدام احنا اللى بتعمل كده بنفرح بالمنتخب مش ساعه ولا اتنين لا دى اسابيع ويمكن شهور
ومش بنهتم بغيره من الاحداث المهمه فعلا
لو بدانا نغير اللى مش عاجبنا بنفسنا واولادنا فى المستقبل هتفرق كتير

انا شايفه ان مصر جميله اوى جميله بناسها وطيبتهم
ودى اهم حاجه وبالناس دى ممكن نعمل كتير جدا

روح
.
.

انثى عدد الرسائل : 552
القسم : حاسبات
شخصيتك : طيب
الفرقه : الثالثه

الرجوع الى أعلى الصفحة اذهب الى الأسفل

default رد: أحمد حلمي يكتب: جواب

مُساهمة من طرف *TITO* في الثلاثاء فبراير 23, 2010 10:39 pm

روح كتب:
hazem كتب:جميييييييييييييييييييييييل جدا


وفعلا محدش زينا لاننا شعب بيشتم اخوه بسبب ماتش كوره

ومئات الالاف بيستقبلوا منتخبهم ولبرادعى بيستقبلوا عشرات و.....

اه فعلا بس الشعب دا انا وحضرتك واخويا وابن عمى وابن خالى وقريبتى اللى فى القاهره واللى فى الاسكندريه
يعنى احنا ومدام احنا اللى بتعمل كده بنفرح بالمنتخب مش ساعه ولا اتنين لا دى اسابيع ويمكن شهور
ومش بنهتم بغيره من الاحداث المهمه فعلا
لو بدانا نغير اللى مش عاجبنا بنفسنا واولادنا فى المستقبل هتفرق كتير

انا شايفه ان مصر جميله اوى جميله بناسها وطيبتهم
ودى اهم حاجه وبالناس دى ممكن نعمل كتير جدا

اولا موضوع جميل جدا جزاك الله كل خير ياباشمهندس على الكلام الجميل

وفعلا ياروح مصر جميلة جدا باهلها وطيبتهم بس متتوقعيش من الناس ديه ان هيا تفضل كده تحت كل الظروف اللى احنا عايشينا تحت الضغط اللى الشعب المصرى عايش فيه تحت المرتبات الفظيعة اللى الشعب بياخدها واللى مفروض ياكل بها عيلة ويدخل مدارس ويدى دروس ويجيب هدوم

لو صلحنا المجتمع اكيد شعبه هيبقى احسن شعوب

*TITO*
.
.

انثى عدد الرسائل : 893
القسم : حاسبات
شخصيتك : بحب الهزار
المزاج :

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى